Սուրբ Անտոնինոսը բնակվել է Ալեքսանդրիայում։ Չկամենալով զոհ մատուցել կուռքերին՝ ենթարկվել է ամենադաժան տանջանքների և ապա՝ այրվել կրակի վրա։

Նիկոմիդացի երկու ազնվականներ Անիքտոսը և նրա եղբորորդի Փոտինոսը, ներկա լինելով Դիոկղետանիոսի քրիստոնյաների դեմ հալածանքներ սկսելու հրովարտակի ընթերցմանը, աներկյուղ դուրս են գալիս ամբոխից ու կայսեր առաջ բարձրաձայն խոստովանում իրենց հավատքը՝ քարոզելով նրա զորությունը։ Երեք տարվա բանտարկությունից ու ծանր տանջանքներից հետո, կրկին հավատարիմ իրենց հավատքին, երանելի սրբերը ողջակիզվում են այլ նահատակների հետ միասին։

Լիբիացի Թեոփիլոս սարկավագը ևս նահատակվել է Քրիստոսի հավատքը աներկյուղ քարոզելու համար՝ կռապաշտ Մաքսիմինոսի օրոք։

Այս բոլոր սրբերի հիշատակները Հայ Եկեղեցում նշվում է Հոգեգալստի չորորդ շաբաթվա երկուշաբթի օրը։