Այստեղ տեղադրենք տոնին հարմար կերակուրների բաղադրատոմսերը.
Շոգեխաշած իշխան
Հարկավոր է մաքրած ամբողջական իշխանը աղով, ներսից կարմիր պղպեղով, դրսից սև պղպեղով համեմել, պահել մի քանի ժամ, այնուհետև հանել, փոքր-ինչ ցողել կիտրոնի հյութով, դնել բարձր տարայի մեջ, որտեղ լցված է ջուրն այնքան, որ իշխանին չծածկի, խաշել 15 րոպե՝ աստիճանաբար մեղմացնելով կրակը /խորհուրդ է տրվում ձկնեղենի հետ դափնու տերև դնել, սակայն ես ինքս չեմ օգտագործում իշխանի հետ, որովհետև դրանից իշխանի համը որոշ չափով «սովորական» է դառնում. իմ կարծիքով, իշխանն իր յուրահատուկ հոտն ունի, որը չի կարելի սքողել տարատեսակ հոտերով/:
Հանելուց հետո հարկավոր է առատորեն ցողել կիտրոնի հյութով:
Եթե հնարավորություն կա, կարելի է այն ամբողջապես գոլորշու վրա շոգեհարել, որովհետև այդպես ավելի լավ համ է ունենում, սակայն ջրով եփելն էլ հրաշալի արդյունք է տալիս:
Տոնական մի գեղեցիկ բաղադրատոմս կուզենայի ներկայացնել:
ՄՐԳԱՅԻՆ ԿՐԵՄ
Անհրաժեշտ բաղադրիչներ՝ 4 հատ բանան, 400 գ կաթնաշոռ, կես բաժակ շաքարի փոշի, 1 հատ կիտրոն, 1 փոքրիկ գավաթ ցանկացած գունավոր լիկյոր (կարելի է օգտագործել ինչպես դեղձի, այնպես Էլ այլ մրգերի ու հատապտուղների համով), 100 գ յուղալի սերուցք։
Կաթնաշոռը, շաքարի փոշին և կիտրոնից քամված հյութը լավ խառնվում են միմյանց և հարվում մինչև փրփրելը։ Ավելացվում են լիկյորը և հարած սերուցքը։
Բանանները մաքրվում են մաքրվում են կեղևից, կտրատվում շերտերի և տեղադրվում բաժակների մեջ։ Ապա բաժակների մեջ բանանների վրա ավելացվում Է կրեմը և մատուցվում սառը վիճակում։ Բանանների փոխարեն կարելի Է օգտագործել տանձ, խնձոր կամ դեղձ: